يالله انا طالبك جنه وغفران
وتفرج هموم في ضميري دفينه
البارحه ما نمت صاحي وسهران
لين الفجر نادوا به مأذنينه
مكالمه جتني وانا كنت شفقان
وكنت أحسب التوقيت بيني وبينه
وقام يتشكى من همومه وزعلانو
من كبر همه ون ونه حزينه
ويقول انا يا بوي شبيه غرقان
في وسط بحر طابع بالسفينه
والبحر من فوقه على أشكال وألوان
ولا بقي له كون ربي يعينه
جتنا كورونا وأغلقت كل ميدان
ومن الجايحه مابه حصون حصينه
وأصبحت مثل الطير من غير جنحان
ولا حصان منكسر من يدينه
بماليزيا مالي قرايب ولا اخوان
غريب دار وناس في ذي المدينه
و الفايده ما فدت شيء وخسران
والعلم واقف ماحن مواصلينه
دراستي ضاعت وحالي بنقصان
وراحت علي فرصه وكانت ثمينه
رديت لا تحزن ولا انت بغلطان
العبد ماله كون ما في جبينه
مكتوب والمكتوب لابده يبان
للأدمي وشوف كل شيء بحينه
امر من المولى على الانس واللجان
احد بنعيم واحد تبت يدينه
ولا تشتحن ما دمت من شعب سلمان
وولي عهد جعل تسلم يمينه
دامو لنا وبلادنا خير الأوطان
راعي امين و الرعيه امينه
الله يطول عمر مولاي سلمان
وولي عهده جعل تبطي سنينه
تر بالسفاره لك ربوع وأخوان
أخوة الإسلام دينك ودينه
كبيرهم الأستاذ محمود قطان
ياجعل يسلم هو ومعاونينه
قالوا انت ضيف عندنا ضمن ضيفان
حتى نردك للديار الامينه
يالله ياعالم بسري والاعلان
انك تحفظ الضيف ومعزبينه
وصلوا عدد ما سال سيل بوديان
على النبي المدفون بأرض المدينه
