الشاعر أ. محمد الغامدي
سلام ياللي لك في الـروح ذكـرى
ذكـــرى مـع الايـــام يبقى اثـرها
ذكراك يالغـالي على البال تطرىٰ
مثل السـحايب لا تهاطل مطرها
الليل واحساسي وهمسـة وقمرا
وانغــام صوتك يوم تعزف وترها
مشاعري في بحَّة حروفك اسرىٰ
مكـبَّـلـة بين الحــروف وخـبرهـا
حتى الحروف تقول يوم انت تقرا
ودي بمــوتي فــوق ثغــرٍ نثــرهـا
كنت المحبــة والغلا يـوم تشـرىٰ
كنت بحيــاتي شمسها أو قمـرها
حبيت بــرد الليــل والجــو عصرا
واحب اعــانق في الضبـابة وبرها
ياصاحبي تكفى ترى الشوق جمرا
واســأل مجـرّب ذاق منها شررها
والعـذر لك ياصـاحبي وانت تدرىٰ
لو جـا خطيَّـة مـا حسـبنا خطرها
وختـامهـا باهـدي لك اليوم شعرا
لك يامنى روح العطيب وبصــرها
