محمد برناوي 

الحمدلله والصلاة والسلام على رسول …. وبعد

المهم صرت أفكر هو تصرفنا صح ولا خطاء والمفروض في الأول أخطبها من اَهلها وتأخذني الأفكار وأرجع أبرر لنفسي وأقول أنا ناوى خير وما في غلط راح يصير إن شاء الله خصوصاً انه كلامنا كله في حدود الأدب وبدون عواطف ولا نوايا ما هي طيبة ولا وعود .
شيء آخر الموافقة تحتاج إجراءات وممكن تطول وهما في تونس ممنوع تعدد الزوجات ولسه مش عارفين حنكمل لما نتقابل ولا ينتهي الموضوع وتصير معرفة خير وكل يروح في حاله كل هذي الأمور ما عملنا حسابها ولا فكرنا في المسافة والحدود وكانا نملك عصا سحرية ومع مرور الوقت .
هي : صارت تناديلي السلطان لأني مزوج اثنين .
انا : اناديها السلطانة .
أنا : طيب شو راح تقولي لهم أني مزوج .
هي : راح أقول مزوج ومطلق .
أنا : والله لو عرفوا أهلك يزعلوا .
هي : المهم نزوج بعدين مافي مشكلة لأنه احنا صادقين وناوين خير .
وتمر الأيام ويخلص شهر رمضان وندخل شهر العيد طبعاً أنا رتبت أموري مع البيتين حيكون عندي مؤتمر في تونس لمدة خمسة أيام طبعاً المؤتمر تكليف من العمل وأستئذنت من الوالد والوالدة ربي يتفضل عليهم بالصحة فقال الوالد ايش هذا المؤتمر اللي في تونس انا زرتها قبل ثلاثين سنة تقريباً المهم الله يرجعك بالسلامة ومن آداب السفر الإستئذان من الوالدين .
وحان وقت السفر ١٠شوال الساعة الواحدة ليلاً ودعت الجميع وتوجهت للمطار وطبعاً كانت السلطانة معي لحظة بلحظة تتابع خطة السير عبر الواتس .
وكان المفروض تجي على المطار تستقبلني بس مؤخراً اتفقنا نتقابل في الفندق لأنه أمها موجودة الموقف حيكون صعب شوية ، طبعاً حجزت الفندق من قبل عن طريق بوكنج .
الساعة السادسة والنصف صباحاً موعد إقلاع الرحلة للأسف تأخرت ساعتين وفي الطيارة الجو كان حار جداً فقلت هذي البداية سبحان الله الإنسان لما يكون غلطان أي موقف يحصل له يتوقع انه عقاب .

الحمدلله اقلعت الطيارة وأنا أقول في نفسي فين رايح طيب طلعت سمينة دبدوبة زي الكورة وانا ماحب الحريم اللي وزنهم زايد أو كما يقال في القصص غير الواقع أو عصابة ؟ أوشاب !! أو إبتزاز؟؟؟؟ وأرجع أطمن نفسي وأقول الله يسهل أنا ناوي خير ياربي سهل الأمور .
وصلت الرحلة الحمدلله وقتها كان الوقت العاشرة والنصف صباحاً بتوقيت تونس .
أنا : اتصلت عليها .
هي : الحمد لله على السلامة .
أنا : الله يسلمك حاخذ سيارة على الفندق .
هي : أنا مع أمي في السوق نشتري شوية أغراض .
أنا : طيب حسبقكم على الفندق .
الفندق عبارة عن منتجع في منطقة اسمها قمرت شبه (أبحر) كلها شاليهات أسم الفندق رمادا
هي : لما أوصل الفندق أكلمك .
أنا : وصلت الفندق وتممت الحجز كانت غرفتي مطلة على المسبح .
هي : وصلنا تعال أستقبلنا ؟!؟!؟!؟!

أنا : والله حوسة كيف أعمل الله يسهل المهم طلعت شفت بنت وأمها قلت أكيد هما لان الصورة اللي في عقلي مع هول الموقف كلها أتبخرت ما في غيرهم تشجعت استقبلتهم سلمنا باليد عندهم عادي السلام عادي بين الناس على من عرفت ومن لم تعرف سوءً رجل أو أمراءة عرفتني على أمها طبعا كأنا نعرف بعض وعندنا مؤتمر ، تممو حجزهم وراحوا على غرفتهم .
هي : نرتاح بعدين تتقابل في اللوبي .
أنا : طيب رحت على غرفتي وحسيت الأم خايفة مني على بنتها المهم طلعت على غرفتي ارتحت شوية وبعد ساعة تقريبا اتصلت قالت نتقابل في اللوبي .
أتقابلنا ومعاها أمها مشينا ناحية الشاطئ ونحكي محنا مصدقين نفسنا والله كأنه حلم ونتعرف على بعض في الحقيقة الحمد لله عدت الأمور فعلاً كأنه نعرف بعض من سنين مافي أي اكشن
بعده رجعنا على غرفنا نرتاح والعشية طلعنا مع بعض العشية عندهم المساء رحنا كوفي في المرسى كان حلو كثير وهادي محل مفتوح يجلسوا فيه الناس ورحنا على قهوة شربنا شاي واكلنا بنبولني عبارة عن شي يشبه اللقيمات بس دائري ويغمسوه في السكر .
بعدها طبعا عزمتهم على غرفتي وعملت لهم كركديه لانه دوما لما كنا نحكي كنت اقول لها باشرب كركديه وكانت تقول ما اعرفه لما تجي لتونس جيب منه ، واعطيتهم هدايا بسيطة .
بعدها طلعنا على الليل رحنا كوفي حسيت الأم بدت تتقبلني أحسن من لما التقينا أول مرة .
المهم فعلا في الفندق كان فيه مؤتمر لحسن حظنا الكذبة صارت واقع بس بيضاء زي قلوبنا .
والكذب صفة مذمومة ومن الأمثال حبل الكذب قصير ولكن حكمت الظروف نسأل الله تعالى غفران الزلات وعند التوانسة مثل يقول ( الكذب في المنفعة جايز ) ولكن لا يوجد دليل لجوازه إلا في بعض حالات التوفيق بين الزوجين والله اعلم .
واليوم الثاني اصبحنا الصبح على الفطور نفطر مع بعض ومعانا الأم تترقب ابنتها ونحكي عن العادات والتقاليد وشي أفهمه من الأم وشي تترجمه ليا بنتها بعد الفطور رحنا على وسط البلد (المنقيلا )يعني ساعة بالقرب من تمثال الحبيب بورقيبة .
المهم فرصة طالما انا في السوق أيش رأيك نشتري خاتم الخطوبة قالت أيه نشتريه أصلا الخطبة عندهم عادي تصير .
ورحنا اشترينا خاتم لأنه لازم اخطبها من أمها .
وفِي المساء رحنا على سيدي بو سعيد وهناك كلمت أمها وقلت لها أنا من السعودية والعادات عندنا في الزواج لازم من الشوفة الشرعية ولسه في اجراءات رسمية وانا اتشرف بخطبة بنتك قالت الام أنا مع سعادة بنتي بس الله يعينك على راسها ( راسها صحيح ) هذا مثل عندهم قالت الام راح تحكي مع ابوها في الوقت المناسب وأجي اخطبها رسمي .
قلت لها المهم تكوني موافقة قالت موافقة ولبستها الخاتم وشربنا عصير واكلنا حلو بعدين رحنا اتعشينا بمناسبة الخطبة .
وفي اليوم الثاني حتسافر الأم وراح تجي أختها تناوب بدل الأم .
جات أختها ثاني يوم وسافرت الأم وقالت لي الأم وهي مسافرة أمانة أنتبه لهم حسّيت بطيبة الناس وثقتهم .
خرجنا بعد ما راحت الام نتغدى في حلق الوادى منطقة بحرية حلوة .

وفِي المساء رحنا على مدينة الألعاب وهناك صار موقف مع الشرطي أتوقع أني ليبي وطلب إثباتنا أنا ما كان معي الجواز هي طلعت البطاقة سألها الشرطي مين أنا قالت خطيبي وسألني الشرطي عنهم فرديت عليه المهم خربطت في اسم ابوها هو اسمه ؟ وان دوما انادي باسم مأمون تعرفوا خرابيطي بس الحمدلله الشرطي طلع متفهم قال هو خايف عليهم وحسب قانونهم ممنوع .
طبعا أختها عمرها ( 17 ) سنة هما يعتبروها طفلة صغيرة عندنا امهات في سن ( 17 ) وأصغر
وبعدين رحنا البحيرة كملنا السهرة مكان زي كورنيش جدة فيه مطاعم .
المهم في التكسي كنت اجلس قدام جنب السواق وهيا في الخلف كانت تقول عيب نجلس كلنا في الخلف وصارت تقولي لا تحكي عشان ما يعرفوا انك غريب لان القانون التونسي ممنوع التونسية تتكلم مع الاجانب او ترافقهم وعندهم سندوتش لذيذ اسمه مقلوب والفلفل عندهم شي رئيسي أغلب اكلهم حار سلطة مشوية وهريسة وكمان الأكل البحري مميز والتونة ، التاكاسي عندهم غالي بس لازم للمشاوير وفي باص أرخص ، الناس في حالهم وطيبين .
والجمعة رحنا على السوق في وسط البلد نشترى هدايا والعشية اخذنا اختها على سيدي بوسعيد وبعدين على المرسى واكلنا ايس كريم ورجعنا تعشينا في الفندق جمبري وبريكة افتكر تقول بريكة ب 13 دينار تقريبا شو البريكة هي تقصد سعرها غالي بس طبعا هذي اسعارالفنادق كل شي ضعف خلصنا عشاء الحمد لله وعالنوم .
المهم عرفنا بعض واتفقنا على الزواج ونصبر لين تصدر الموافقة وإجراءاتها .
ومن بكرة الصباح السبت فطرنا مع بعض وودعتني وعلى المطار راجع والحمد لله وصلت بالسلامة.

ـــــــــــــــــــــــــــــــــــــــــ
هل تتجوز السلطانة السلطان تابعونا في الجزء الرابع
حصرياً على صحيفة شاهد الآن