انكسر غصن الوصال وما هقيت
كيف نبت التوت يقطع من حلاه؟
بَعـْد وصــلات امزجتنـا ما لقيت
إلا لــونه يعــترك فـــرقى لقـــــاه
واستوى الخاطر وكم فكره عنيت
بَعْــد ما كــنت اعتــقد زود لغــلاه
ما انحــنى للريــح قــلّه ليت ليت
جَــرّب الليْــن وتـمــايـل مبـتغـــاه
ما عـطى الــتيار جــوّه وابتـديت
ألحــم الغصـنين من لحـظة جفـاه
حتى حاولت ازرعـه في كل بيت
ينكـسر وزن التــلاقــي من جــزاه
يوم كان الزين زيــن بكـل صيت
كـان كـل اللي يـشـوف بها الحياه
كـان لـونه جــمر فـتّــان وجنيت
وَرْقـَه الأخضــر يســامرني مـعاه
كــان حُمّيض اللـذاذه لا اشتهيت
زارنـي واعـطى شـفاتـي مــنتهاه
كــان من يلــفي علي كلّـي لفيت
وآتمــطق آآه فــي أطـــرى لهـــاه
كـان لي اسـمى غرام وما شكيت
من ســكرت بطعـمه اللي لا سواه
من سقـاه الويل ياللي ما سـقيت
حسـن قـربي بعد ما صدري سقاه
من هـو اللي عَلّـمه سـمي وجيت
من شـمخ قــلبي وجَرّحني بـ أذاه
كــنت أدَليـه الغـلا حـتى رجــيت
خــير يلـحــقنــي ولــكنّـه رمــــاه
وش بقى من غصن وصله ما هقيت
كيف نبت التوت يقطع من حلاه؟
